AMADA-nın direktoru Avropa Şurasının gender bərabərliyi üzrə məruzəçisi seçilib
-
15:29
-
24 Oktyabr 2019
Azərbaycan Milli Antidopinq Agentliyinin (AMADA) direktoru Şəfəq Hüseynli Avropa Şurasının gender bərabərliyi üzrə məruzəçisi seçilib.
Azərbaycan Gənclər və İdman Nazirliyinin mətbuat xidmətindən APA-ya verilən məlumata görə, qərar Strasburq şəhərində keçirilən Avropa Şurasının Ümumdünya Antidopinq Agentliyi ilə iş üzrə xüsusi komitəsinin (CAHAMA) 48-ci iclasında qəbul edilib.
Avropa Şurasının hökumətlərarası orqanları və digər strukturları çərçivəsində təyin edilən gender bərabərliyi üzrə məruzəçilər tərkibində olduqları müvafiq orqan və ya strukturun işinə, siyasətinə, proqram və fəaliyyətlərinə gender bərabərliyi konsepsiyasının daxil edilməsi yollarının müəyyənləşdirilməsi istiqamətində fəaliyyət göstərirlər. Ş.Hüseynli CAHAMA-nın işində gender bərabərliyi prinsiplərinin tətbiq edilməsi üzərində işləyəcək.
Ş.Hüseynli iclasda çıxış edərək bildirib ki, antidopinq təşkilatlarının başlıca məqsədi ədalətli idman və bütün idmançılar üçün bərabər hüquqlar, imkanlar naminə mübarizədən ibarətdir: “Gender tarazlığını təmin etmədən bu məqsədə nail olmaq mümkün deyil. Kişilər və qadınlar arasında mövcud olan bərabərsizlik problemi idman dünyası üçün də aktualdır”.
2019-cu ilin mayında Ş.Hüseynli Avropa Şurasının “idmançıların ədalət mühakiməsinə maneəsiz çıxışının təmin edilməsi” üzrə xüsusi işçi qrupunun sədr müavini seçilib. Qrupun əsas məqsədi antidopinq qaydalarının tətbiqi zamanı idmançıların hüquqlarının səmərəli müdafiəsi və onların ədalət mühakiməsinə maneəsiz çıxışının təmin edilməsidir. Bu müddət ərzində Azərbaycan tərəfi dopinqə qarşı mübarizə zamanı insan hüquqlarının qorunması sahəsində bir sıra tədbir həyata keçirib və bir sıra təklif irəli sürüb.
Avropa Şurasının Antidopinq Konvensiyası 1989-cu ildə qəbul edilib. Azərbaycan bu sənədi 2002-ci ildə imzalayıb.
Digər xəbərlər
VİDEO XƏBƏRLƏR
Laçının işğaldan azad edilməsi Taxtakörpüdə qeyd edilib - VİDEO
BNA: Paytaxtın bəzi küçə və prospektlərində avtobuslar üçün xüsusi hərəkət zolaqları yaradılır - VİDEO
İşğaldan azad olunan Laçın rayonunda Azərbaycan bayrağı qaldırılıb - VİDEO
