Həftəsonları xüsusi qaydalar tətbiq edilməyən bölgələrin məktəblərində 6 günlük iş həftəsinə keçiləcək

Həftəsonları xüsusi qaydalar tətbiq edilməyən bölgələrin məktəblərində 6 günlük iş həftəsinə keçiləcək
  • Clock-gray 17:49
  • calendar-gray 14 Sentyabr 2020

Xüsusi karantin rejimi dövründə dərslərin əyani formada keçirilməsi zamanı şagird sıxlığını tənzimləmək üçün bir sıra tədbirlər görülməlidir. 

APA-nın məlumatına görə, bu barədə Təhsil nazirinin müavini Məhəbbət Vəliyevanın Naxçıvan Muxtar Respublikasının Təhsil Nazirliyinə, rayon (şəhər) təhsil şöbələrinə (idarələrinə) və Təhsil Nazirliyinin birbaşa tabeliyində olan təhsil müəssisələrinə ünvanladığı məktubunda bildirilib. 

Bu tədbirlərdən biri budur ki, həftəsonları üçün xüsusi qaydalar tətbiq edilməyən şəhər və rayonların ümumi təhsil müəssisələrində 6 günlük iş həftəsinə keçiləcək. Sinif komplektlərinin məktəbə gəlmə qrafiki həftənin günləri üzrə bölüşdürüləcək. Bu zaman regiondan asılı olaraq hər sinif məktəbə həftədə 2 və ya 3 dəfə gələcək. Tədris otaqlarında hər parta arxasında yalnız bir təhsilalanın oturması və onlar arasında məsafənin hər tərəfdən 1,5 metrdən az olmaması təmin olunacaq. Bu məqsədlə, zərurət yarandığı halda, siniflər yarımqruplara bölünür və hər qrup üçün dərs cədvəli hazırlanacaq. 

Sinif yarımqruplara bölünərkən “Xarici dil” fənni üzrə müəyyənləşdirilmiş bölgüdən istifadə olunacaq. Siniflərin qruplara bölünməsi zərurəti yarandığı halda, tədris planında həftəlik əyani dərs saatı 1 saat müəyyənləşdirilmiş fənlər hər bir qrup üçün həftəaşırı əyani formada tədris olunacaq. Beləliklə, müəllimlərin əlavə dərs yükü yaranmayacaq. Təhsilalanların fənlər üzrə həftəlik dərs yükünün miqdarının tam təmin edilməsi və təlim ehtiyaclarının ödənilməsi teledərslər vasitəsilə kompensasiya ediləcək. Tədris planında fənnin distant (məsafədən) formada tədrisinə ayrılmış saatlar müəllim tərəfindən bütün sinfə keçiləcək. 

Günay Elşadqızı

Digər xəbərlər